As precipitacións foron intensas onte, sobre todo na provincia de Pontevedra. Na imaxe inferior, un bosque devastado en Arbo, e abaixo, un monte próximo á cidade pontevedresa.

Cayeron as primeiras choivas intensas sobre a terra queimada e tamén caeron, como do ceo, os primeiros datos oficiais relativos aos incendios forestais. A Consellería de Medio Rural mandou parar onte o baile de cifras que se viña celebrando en Galicia nos últimos días, ao admitir con certa crueza que entre os días 4 e 15 de agosto arderon un total de 77.000 hectáreas, é dicir, o 2,6% da superficie total da comunidade autónoma.

O responsable de Medio Rural, Alfredo Suárez Canal , recoñeceu sen ningún tipo de paliativos que se trata dunha cifra grave e importante, «sen ningunha dúbida», dixo, e ata admitiu que se superaron de xeito ostensible algunhas das previsións que se manexaban desde a propia Administración galega.

Ademais, a metade das hectáreas que foron arrasadas polas chamas nos últimos doce días pertencen á provincia de Pontevedra, un total de 38.500, mentres a demarcación da Coruña salda a súa conta de agravios con outras 28.000 hectáreas destruídas, o 36,3% do total.

Nas dúas provincias orientais, os danos foron sensiblemente inferiores. En Ourense arderon 8.500 hectáreas, co matiz de que o conselleiro considera que se trata dun dato posiblemente sobreponderado. En Lugo , a cifra é de 2.000 hectáreas perdidas de superficie arboredo e monte raso.