|
O movemento aglutinado arredor do lema "Galiza non se vende" continúa deste xeito a súa actividade O movemento que o 6 de maio se aglutinou para realizar unha manifestación arredor do lema "Galiza non se vende" segue vivo. E non renuncia a conseguir un cambio de rumbo na andaina depredadora de certas empresas. Por iso, a Rede Litoral Vivo, na que se integran máis de vinte asociacións ecoloxistas, chama a unha xuntanza que se celebrará o vindeiro sábado día 20 de outubro ás 12 horas na Galería Sargadelos de Compostela, aberta a todos os colectivos cidadáns, organizacións ecoloxistas, representantes da cultura e calesquera cidadáns que "sintan a necesidade de opoñerse á perda do privilexiado hábitat galego, o que mellor define a nosa identidade", segundo explica esta plataforma ecoloxista nun comunicado.
O pasado 6 de maio tivo lugar en Compostela unha manifestación organizada pola práctica totalidade das organizacións ecoloxistas galegas. O motivo que impulsou esta convocatoria unitaria foi a degradación do territorio por mor do urbanismo desmedido, a contaminación das rías e do litoral, a depredación causada polas minas a ceo aberto, a invasión polas piscifactorias dos espazos protexidos, as plantas de gas e as celulosas contaminantes, etc.
"A realidade amosou que os fortes intereses económicos inherentes ás empresas prevalecen sobre a defensa medio ambiental do territorio. Proxectos como os de Reganosa, o Plan Acuícola ou as minas do Courel, por poñer algún exemplo, seguen adiante a pesar de conculcar a legalidade vixente", sinalan.
|
Ecociencia 
