| Compostela acollerá o II Congreso de Música Tradicional Galega |
 |
 |
 |
|
Tentando cumprir un dos seus principais fins, a normalización da cultura musical de Galicia, a Asociación de Gaiteiros Galegos (AGG), ente que representa non só a gaiteiros, senón tamén a todo tipo de músicos tradicionais, bailadores e demais xente implicada no folclore musical galego, organiza o II Congreso de Ensinantes de Música Tradicional Galega. O obxectivo fundamental deste congreso é reunir ós principais actores do ensino da música e baile tradicional nun marco que permita a discusión das futuras liñas a seguir, para que o noso patrimonio musical sexa posto en valor e transmitido dun xeito moderno e eficaz ás novas xeracións. Nesta ocasión, ademais de tratar a situación do ensino da música tradicional nas escolas de música, conservatorios e asociacións culturais, centrarémonos especialmente no ensino obrigatorio. O futuro das nosas tradicións, da nosa música, a nosa lingua, canto e baile, pasa inevitablemente pola transmisión destes coñecementos ás novas xeracións, para que saiban conservalos e respectalos. noticiasgalicia.30/11/07 Este relevante congreso está patrocinado pola Dirección Xeral de Creación e Difusión Cultural da Xunta de Galicia, así como pola Concellaría de Cultura do Concello de Santiago de Compostela. Na súa organización colaboran a AS.PG e a CIG, xunto coas Universidades de A Coruña e Vigo. Nel poderanse escoitar un total de cinco relatorios levados a cabo por importantes investigadores e docentes galegos que tratarán temas tan interesantes como os ³coidados básicos da voz e exercicios prácticos para cantar dun xeito saudable²; ³xogos populares e tradicionais galegos²; así como a ³aplicación das novas tecnoloxías no ensino da música tradicional². Tamén contaremos con obradoiros prácticos como por exemplo un ³taller de construcción de xoguetes sonoros² ou ³cantigas para os máis pequenos². Estes relatorios e obradoiros alternaranse con mesas redondas onde se debaterán temas relacionados coa música tradicional, e ademais presentaranse as comunicacións seleccionadas entre as propostas recibidas para este congreso.O II Congreso de Ensinantes de Música Tradicional Galega celebrarase no Auditorio de Galicia, en Santiago de Compostela, os días 7, 8 e 9 de Decembro e vai dirixido a todo tipo de docentes, xente interesada neste tipo de ensino e a estudantes universitarios, para os que a asistencia contará como créditos de libre elección para as Universidades de A Coruña e Vigo. Tamén esta en trámite a homologación desta actividade pola consellería de Educación. |
Dereitos de autor ©2010 Galizacelta.com